Cofnodion

Anfonodd y Dirprwy Lywydd ei ymddiheuriadau.

Nododd y Pwyllgor y cofnodion ar gyfer eu cyhoeddi.

Rhoddodd y Llywydd wybod i'r Pwyllgor Busnes ei bod hi wedi cytuno i gynnig i newid aelodaeth y Ceidwadwyr Cymreig ar y Pwyllgor Cyfrifon Cyhoeddus (William Graham i gymryd lle Mohammad Asghar) gael ei gymryd yn union ar ôl y Datganiad a Chyhoeddiad Busnes ddydd Mawrth.

Cynhelir y Cyfnod Pleidleisio ddydd Mawrth ar ôl yr eitem olaf o fusnes. Cytunodd y Pwyllgor Busnes y dylid cynnal y Cyfnod Pleidleisio cyn y Ddadl Fer ddydd Mercher.

Nododd y Pwyllgor Busnes y byddai'r cwestiynau i'r Cwnsler Cyffredinol a drefnwyd ar gyfer dydd Mercher 7 Mai  2014 yn cael eu symud i ddydd Mercher 30 Ebrill, a chytunwyd nad oedd angen  atal y Rheolau Sefydlog dros dro er mwyn i hynny ddigwydd.

Nododd y Pwyllgor Busnes Amserlen Busnes y Llywodraeth ar gyfer y tair wythnos nesaf.

Penderfynodd y Pwyllgor Busnes ar drefn y busnes a chytunodd i amserlennu’r eitemau canlynol o fusnes:

Dydd Mercher 14 Mai 2014

• Cwestiynau i Gomisiwn y Cynulliad (15 munud)

• Dadl gan Aelodau Unigol o dan Reol Sefydlog 11.21(iv) (60 munud)

• Amser a neilltuwyd i'r Ceidwadwyr Cymreig (60 munud)

• Amser a neilltuwyd i Blaid Cymru (60 munud)

• Dadl Fer (30 munud)

Nododd y Pwyllgor Busnes gynnig y Llywodraeth i ohirio gosod Memorandwm Cydsyniad Deddfwriaethol a datganiad ysgrifenedig tan fod Llywodraeth y DU wedi gosod ei gwelliannau i'w hystyried yn y cyfnod Pwyllgor. 

Cytunodd Rheolwyr Busnes mewn egwyddor y dylid cyfeirio'r Memorandwm Cydsyniad Deddfwriaethol i'r Pwyllgor Cyllid a'r Pwyllgor Materion Cyfansoddiadol a Deddfwriaethol er mwyn iddynt graffu arno a byddant yn cadarnhau'r penderfyniad hwnnw ac yn cytuno ar ddyddiad ar gyfer cyhoeddi adroddiad yn ddiweddarach, unwaith y bydd y Llywodraeth wedi gosod y Memorandwm Cydsyniad Deddfwriaethol. 

Cytunodd y Pwyllgor Busnes i gais gan y Pwyllgor Plant, Pobl Ifanc ac Addysg i ymweld â Dulyn a Glasgow ddydd Mercher 30 Ebrill  – dydd Gwener 2 Mai 2014.

Cytunodd y Pwyllgor Busnes ar ddyddiadau toriadau'r hydref a'r Nadolig ar gyfer 2014 a dyddiadau dros dro ar gyfer toriadau hyd at doriad y Pasg 2015 (gweler isod).

Trafododd y Rheolwyr Busnes ddyddiadau amgen ar gyfer toriadau ond barn y mwyafrif oedd y dylid cadarnhau'r dyddiadau a gynigiwyd ac ail-edrych ar y mater wrth ystyried Amserlen y Cynulliad ar gyfer 2015.

*Dyddiadau dros dro i'w cadarnhau gan y Pwyllgor Busnes.

Cymeradwyodd y Pwyllgor Busnes y trefniadau cyflwyno arfaethedig ar gyfer toriad y Pasg a chyfnodau gwyliau banc.

Aelodau yn gadael y Siambr

Yn sgîl Aelodau'n gadael y Siambr yr wythnos ddiwethaf ar ôl cymryd rhan mewn dadl / gofyn cwestiwn, nododd y Dirprwy Lywydd ar y pryd y byddai canlyniadau i bobl o ran peidio â chael eu galw yn y dyfodol.  Cafodd y neges hon ei hail-adrodd gan y Llywydd i'r Rheolwyr Busnes.

Cwestiynau a dynnwyd yn ôl

Atgoffodd y Llywydd y Rheolwyr Busnes mai dim ond o dan amgylchiadau annisgwyl ac anochel y dylid tynnu cwestiynau llafar y Cynulliad yn ôl, a gallai tynnu cwestiynau yn ôl o dan amgylchiadau eraill olygu canlyniadau i Aelodau o ran cael eu galw i siarad yn y dyfodol.

Cyflwyno Cwestiynau

Nododd y Pwyllgor Busnes mai dim ond 14 cwestiwn a gyflwynwyd i'r Gweinidog Addysg a Sgiliau yr wythnos hon, oedd yn golygu bod chwe Aelod yr oedd eu henwau wedi eu dewis o'r balot heb gyflwyno cwestiynau.

Y Bil Dadreoleiddio

Rhoddodd Gweinidog Busnes y Llywodraeth wybod i'r Pwyllgor Busnes y dylai ddisgwyl Memoranda Cydsyniad Deddfwriaethol atodol i'r Bil Dadreoleiddio ond bod yr amseru'n ansicr ar hyn o bryd.