Cofnodion

Cadarnhaodd y Gweinidog Llywodraeth Leol a Busnes y Llywodraeth y byddai llythyr yn cael ei anfon at y Llywydd yr wythnos hon mewn perthynas â phroses y gyllideb.

Nododd y Pwyllgor y cofnodion ar gyfer eu cyhoeddi.

Rhoddodd y Llywydd wybod i’r Rheolwyr Busnes y byddai cynnig i newid aelodaeth y blaid Lafur ar y Pwyllgor Amgylchedd a Chynaliadwyedd, yn cael ei gyflwyno ar ôl y Datganiad a Chyhoeddiad Busnes ddydd Mawrth, pan fyddai Gwyn Price yn cymryd lle Vaughan Gething.

Cynhelir y Cyfnod Pleidleisio ddydd Mawrth ar ôl yr eitem olaf o fusnes. Cytunodd y Pwyllgor Busnes y dylid cynnal y Cyfnod Pleidleisio cyn y Ddadl Fer ddydd Mercher.

Nododd y Pwyllgor Busnes Amserlen Busnes y Llywodraeth ar gyfer y tair wythnos nesaf.

Penderfynodd y Pwyllgor Busnes ar drefn y busnes a chytunodd i ohirio’r eitem ganlynol o fusnes:

Dydd Mercher 11 Mehefin 2014

·         Dadl ar Adroddiad y Pwyllgor Cyllid ynghylch Ariannu Addysg Uwch (60 munud)

Cytunodd y Pwyllgor Busnes i amserlennu’r eitemau canlynol o fusnes:

Dydd Mercher 11 Mehefin 2014

·         Amser a neilltuwyd i Ddemocratiaid Rhyddfrydol Cymru (60 munud)

Dydd Mercher 18 Mehefin 2014

·         Amser a neilltuwyd i’r Ceidwadwyr Cymreig (60 munud)

·         Amser a neilltuwyd i Blaid Cymru (60 munud)

·         Amser a neilltuwyd i Ddemocratiaid Rhyddfrydol Cymru (60 munud)

·         Dadl Fer – Nick Ramsay (Mynwy) (30 munud)

Trafododd y Pwyllgor Busnes bapur gan y Llywodraeth ynghylch Memorandwm Cydsyniad Deddfwriaethol mewn perthynas â’r Bil Cyfiawnder Troseddol a’r Llysoedd.

Cytunodd y Rheolwyr Busnes i gyfeirio’r Memorandwm Cydsyniad Deddfwriaethol i’r Pwyllgor Amgylchedd a Chynaliadwyedd ar gyfer craffu arno. Cytunodd y Pwyllgor Busnes hefyd y dylai’r pwyllgor gyflwyno adroddiad ar y memorandwm erbyn 3 Gorffennaf 2014, fel y gellir cynnal dadl ar y Cynnig Cydsyniad Deddfwriaethol yn y Cyfarfod Llawn ar 8 Gorffennaf 2014.

Nododd y Pwyllgor Busnes y papur sy’n rhoi’r wybodaeth ddiweddaraf am gynnydd y Biliau a gyhoeddwyd yn Araith y Frenhines, sef biliau a gyflwynwyd yn Senedd y DU a biliau a gyhoeddwyd ar ffurf drafft.

Cytunodd y Rheolwyr Busnes i ymestyn y dyddiad cau ar gyfer trafodion Cyfnod 2 ar y Bil Tai (Cymru) am un wythnos bwyllgora, tan ddydd Gwener 6 Mehefin.

Diben y papur oedd llywio ystyriaeth Rheolwyr Busnes o’r ffordd y mae’r Cynulliad yn ymdrin â deddfwriaeth, gan gynnwys, a fyddai angen unrhyw newidiadau i’r Rheolau Sefydlog. Mae’r papur wedi cael ei lywio gan brofiadau diweddar o ddeddfwriaeth, yn enwedig y Bil Gwasanaethau Cymdeithasol a Llesiant (Cymru). Mae’n cynnwys rhai newidiadau y gellid eu hystyried ar unwaith yn ogystal â rhai cynigion hirdymor.

Cytunodd y Rheolwyr Busnes ar yr argymhellion yn y papur, a nododd y byddai cynigion mwy manwl yn dilyn maes o law.