Cofnodion

Cafodd y cofnodion eu nodi gan y Pwyllgor cyn eu cyhoeddi.

Cafodd y Pwyllgor y wybodaeth ddiweddaraf gan y Gweinidog Llywodraeth Leol a Busnes y Llywodraeth am y newidiadau i Fusnes y Llywodraeth ddydd Mawrth.

Cytunodd y Rheolwyr Busnes i gais Nick Ramsay i ohirio ei Ddadl Fer a drefnwyd ar gyfer dydd Mercher.

Cynhelir y Cyfnod Pleidleisio ddydd Mawrth ar ôl yr eitem olaf o fusnes. Ddydd Mercher, cytunodd y Pwyllgor Busnes y byddai’r cyfnod pleidleisio hefyd yn cael ei gynnal ar ôl yr eitem olaf o fusnes.

Nododd y Pwyllgor Busnes Amserlen Busnes y Llywodraeth ar gyfer y tair wythnos nesaf.

Nododd y Rheolwyr Busnes absenoldeb y Prif Weinidog o’r Cyfarfod Llawn yr wythnos nesaf, ac y bydd y Gweinidog Llywodraeth Leol a Busnes y Llywodraeth yn ateb Cwestiynau i’r Prif Weinidog ddydd Mawrth 24 Mehefin 2014.

Nododd y Rheolwyr Busnes y byddai’r Ymateb i Adroddiad Comisiwn Cwmnïau Cydweithredol a Chydfuddiannol Cymru bellach yn cael ei gyhoeddi fel datganiad ysgrifenedig, ond gofynnodd bod datganiad llafar ar y mater yn cael ei drefnu yn y dyfodol agos.

Penderfynodd y Pwyllgor Busnes drefn y busnes a chytunodd i amserlennu’r eitemau canlynol o fusnes:

Dydd Mercher 9 Gorffennaf 2014

• Dadl gan Aelodau Unigol o dan Reol Sefydlog 11.21(iv) (60 munud)

• Dadl ar adroddiad y Pwyllgor Amgylchedd a Chynaliadwyedd ar ei ymchwiliad i reoli tir yn gynaliadwy (60 munud) 

• Amser a neilltuwyd i’r Ceidwadwyr Cymreig (60 munud)

• Dadl Fer - Suzy Davies (Gorllewin De Cymru) (30 munud)

Cytunodd y Rheolwyr Busnes ar Amserlen y Pwyllgor ar gyfer 2014 -15, gan ddechrau ar 15 Medi 2014 yn ôl trefn wythnos 1. Nododd y Rheolwyr Busnes fod slot y Pwyllgor Materion Cyfansoddiadol a Deddfwriaethol yn afreolaidd ac y dylid ei adolygu ar gyfer y Cynulliad nesaf.

Cadarnhaodd y Rheolwyr Busnes ddyddiadau toriadau’r gwanwyn a’r Pasg yn 2015, a chytunodd ar ddyddiadau dros dro ar gyfer toriad y Sulgwyn a gwyliau’r haf yn 2015.

Nododd y Rheolwyr Busnes y rhestr o Gwestiynau Llafar i’r Prif Weinidog, Gweinidogion Cymru a’r Cwnsler Cyffredinol ar gyfer 2014-15, a chytunodd ar yr amserlen ar gyfer Cwestiynau i Gomisiwn y Cynulliad.

Cytunodd y Pwyllgor Busnes mewn egwyddor i gyfeirio’r Bil Llesiant Cenedlaethau’r Dyfodol (Cymru) at y Pwyllgor Amgylchedd a Chynaliadwyedd ar gyfer ystyriaeth Cyfnod 1.

Cytunodd y Rheolwyr Busnes y byddent yn gohirio’r penderfyniad ar amserlen y Bil tan yr wythnos nesaf i roi amser ar gyfer ymgynghori â’r Pwyllgor hwn.

Trafododd y Pwyllgor Busnes bapur gan y Llywodraeth ynghylch Memorandwm Cydsyniad Deddfwriaethol atodol mewn perthynas â’r Bil Dadreoleiddio ynghylch gwelliannau i’r Bil o ran Pedolwyr a Chytundebau rhwng y cartref a’r ysgol.

Cytunodd y Rheolwyr Busnes i gyfeirio’r Memorandwm atodol at y Pwyllgor Materion Cyfansoddiadol a Deddfwriaethol, er mwyn iddo graffu arno. Cytunodd y Pwyllgor Busnes hefyd y dylai’r Pwyllgor gyflwyno adroddiad ar y Memorandwm Cydsyniad Deddfwriaethol atodol erbyn 11 Medi 2014 er mwyn i’r Cynnig Cydsyniad Deddfwriaethol gael ei drafod yn y Cyfarfod Llawn ar 16 Medi 2014.

Hefyd, gofynnodd y Rheolwyr Busnes i’r Ysgrifenyddiaeth rybuddio Clercod y Pwyllgor Plant, Pobl Ifanc ac Addysg a’r Pwyllgor Amgylchedd a Chynaliadwyedd am y Memorandwm Cydsyniad Deddfwriaethol rhag ofn bod y pwyllgorau hynny yn awyddus i graffu arno o safbwynt polisi.

Cytunodd y Rheolwyr Busnes i gais gan y Pwyllgor Iechyd a Gofal Cymdeithasol i gynnal cyfarfod ychwanegol o’r Pwyllgor yn ystod wythnos gyntaf toriad yr haf os bydd ei angen i gwblhau ymchwiliad byr.

Yn ei gyfarfod ar 13 Mai 2014, bu’r Pwyllgor Busnes yn trafod papur ar ddiwygio Cwestiynau Llafar y Cynulliad. Gofynnodd y Rheolwyr Busnes am bapur pellach yn nodi cynigion manwl.

Cytunodd y Rheolwyr Busnes i ymgynghori â’u grwpiau ar y diwygiadau posibl a amlinellir yn y papur hwn, gan gytuno i ddychwelyd at y mater ymhen pythefnos.

Dywedodd y Gweinidog Llywodraeth Leol a Busnes y Llywodraeth i’r Pwyllgor Busnes fod y Nodyn Esboniadol ar y Bil Tai (Cymru) ar gael yn Saesneg yn unig tan ddiwedd yr wythnos.