Cofnodion

Nododd y Pwyllgor y cofnodion ar gyfer eu cyhoeddi.

Nododd y Rheolwyr Busnes y byddai'r pleidleisio ar bob eitem oni bai am yng Nghyfnod 3 yn digwydd cyn i drafodion Cyfnod 3 ddechrau ddydd Mawrth, ac y byddai pob pleidlais ar y Bil Tai (Cymru) yn digwydd yn ystod trafodion Cyfnod 3.

Nododd y Pwyllgor Busnes hefyd y byddai egwyl o ddeng munud cyn i drafodion Cyfnod 3 ddechrau, a bod 3.5 awr wedi ei neilltuo ar gyfer yr eitem.

Cytunodd y Pwyllgor Busnes y dylid cynnal y Cyfnod Pleidleisio cyn y Ddadl Fer ddydd Mercher.

Nododd y Rheolwyr Busnes bapur ar y cynlluniau penodol sydd wrth gefn ar gyfer pleidleisio mewn dadl yng Nghyfnod 3.

Nododd y Pwyllgor Busnes amserlen Busnes y Llywodraeth ar gyfer y tair wythnos nesaf (wedi hynny, dosbarthodd y Llywodraeth amserlen tair wythnos  wedi ei diwygio i Reolwyr Busnes i'w chynnwys yn y Datganiad a Chyhoeddiad Busnes).

Holodd y Rheolwyr Busnes a fyddai 30 munud yn ddigon ar gyfer datganiad y Gweinidog Adnoddau Naturiol a Bwyd ynghylch y Rhaglen Datblygu Gwledig 2014-2020 ar 8 Gorffennaf.

Yn ogystal, holodd y Rheolwyr Busnes a fyddai 30 munud yn ddigon ar gyfer y ddwy set o reoliadau ar Les Anifeiliaid (Bridio ac Adnabod Cŵn) ar 15 Gorffennaf.

Penderfynodd y Pwyllgor Busnes ar drefn y busnes a chytunodd ar amserlen ar gyfer yr eitemau busnes canlynol:

Dydd Mercher 16 Gorffennaf 2014

• Cwestiynau i Gomisiwn y Cynulliad (15 munud)

• Datganiad gan Bethan Jenkins: Cyflwyno Bil arfaethedig Aelod – Bil Addysg a Chynhwysiant Ariannol (Cymru) (30 munud)

• Dadl ar Adroddiad Cynllun Ieithoedd Swyddogol Comisiwn y Cynulliad (60 munud)

• Dadl ar adroddiad y Pwyllgor Iechyd a Gofal Cymdeithasol ynghylch argaeledd gwasanaethau baritarig (60 munud)

• Dadl ar Adroddiad y Pwyllgor Cyllid ar Gyllid Cymru (60 munud)

• Dadl Fer - Eluned Parrott (Canol De Cymru) (30 munud)

Trafododd y Pwyllgor Busnes bapur gan y Llywodraeth am Femorandwm Cydsyniad Deddfwriaethol ynghylch y Bil Seilwaith.

Cytunodd y Rheolwyr Busnes i gyfeirio'r Memorandwm Cydsyniad Deddfwriaethol i'r Pwyllgor Amgylchedd a Chynaliadwyedd i wneud gwaith craffu arno. Cytunodd y Pwyllgor Busnes hefyd y dylai’r Pwyllgor gyflwyno adroddiad ar y Memorandwm erbyn 18 Medi 2014, er mwyn trafod y Cynnig Cydsyniad Deddfwriaethol yn y Cyfarfod Llawn ar 23 Medi 2014.

Cytunodd y Pwyllgor Busnes i gyfeirio'r Bil Addysg a Chynhwysiant Ariannol (Cymru) at y Pwyllgor Plant, Pobl Ifanc ac Addysg i'w ystyried yng Nghyfnod 1.

Cytunodd y Rheolwyr Busnes y byddent yn gohirio'r penderfyniad ar amserlen y Bil am bythefnos, i roi amser i ymgynghori â'r Pwyllgor.

Cadarnhaodd y Rheolwyr Busnes eu penderfyniad a wnaed mewn egwyddor ar 10 Mehefin 2014 i gyfeirio'r Bil Trais ar sail Rhywedd, Cam-drin Domestig a Thrais Rhywiol (Cymru) i'r Pwyllgor Cymunedau, Cydraddoldeb a Llywodraeth Leol i'w ystyried yng Nghyfnod 1, a chytunodd ar y dyddiad cau i'r Pwyllor yng Nghyfnod 1 i gyflwyno adroddiad arno, sef 14 Tachwedd 2014, a'r dyddiad cau a nodwyd ar gyfer cwblhau trafodion y Pwyllgor yng Nghyfnod 2 yw 6 Chwefror 2015.

Cadarnhaodd y Rheolwyr Busnes eu penderfyniad a wnaed mewn egwyddor ar 17 Mehefin 2014 i gyfeirio'r Bil Llesiant Cenedlaethau'r Dyfodol (Cymru) i'r Pwyllgor Amgylchedd a Chynaliadwyedd i'w ystyried yng Nghyfnod 1, a chytunodd ar y dyddiad cau i'r Pwyllgor yng Nghyfnod 1 i gyflwyno adroddiad arno, sef 21 Tachwedd 2014, a'r dyddiad cau a nodwyd ar gyfer cwblhau trafodion y Pwyllgor yng Nghyfnod 2 yw 6 Chwefror 2015.

Dywedodd y Gweinidog Llywodraeth Leol a Busnes y Llywodraeth wrth y Pwyllgor y byddai'r Llywodraeth yn gosod Memorandwm Cydsyniad Deddfwriaethol diwygiedig ar y Bil Cyfiawnder Troseddol a'r Llysoedd, gan fod  Llywodraeth y DU wedi cyflwyno gwelliannau ychwanegol yn ddiweddar ynghylch cynllunio, sydd â thebygrwydd clir i'r darpariaethau sy'n destun i'r memorandwm cydsyniad deddfwriaethol a gyflwynwyd eisoes.

Yn ogystal, dywedodd y Gweinidog wrth y Pwyllgor y byddai'r Llywodraeth hefyd yn cyflwyno Memorandwm Cydsyniad Deddfwriaethol Atodol ar y Bil Cyfiawnder Troseddol a'r Llysoedd o ganlyniad i welliannau ar wahân gan Lywodraeth y DU yn ymwneud â throseddau newydd, sef esgeulustod bwriadol a cham-drin gan ofalwyr.

Cadarnhaodd y Gweinidog y byddai papur ffurfiol yn cael ei gyflwyno ar gyfer y Pwyllgor Busnes yr wythnos nesaf.