Cofnodion

Nododd y Pwyllgor y cofnodion ar gyfer eu cyhoeddi.

Nododd y Rheolwyr Busnes y cynhelir y pleidleisiau ar bob eitem o fusnes ac eithrio'r ddadl Cyfnod 3 cyn cychwyn trafodion Cyfnod 3 ddydd Mawrth, ac y byddai pob pleidlais mewn perthynas â'r Bil Tai (Cymru) yn cael eu cynnal yn ystod trafodion Cyfnod 3.

Nododd y Pwyllgor Busnes hefyd y byddai egwyl o 15 munud cyn y bydd trafodion Cyfnod 3 yn dechrau, a bod 3 awr wedi cael eu neilltuo ar gyfer yr eitem.

Cytunodd y Pwyllgor Busnes y dylid cynnal y Cyfnod Pleidleisio cyn y Ddadl Fer ddydd Mercher.

Nododd y Pwyllgor Busnes amserlen busnes y Llywodraeth ar gyfer y tair wythnos nesaf.

Penderfynodd y Pwyllgor Busnes drefn y busnes a chytunodd i amserlennu’r eitemau canlynol o fusnes:

Dydd Mercher 9 Gorffennaf 2014

• Dadl fer - Nick Ramsay (Mynwy) (30 munud)Gohiriwyd ers 18 Mehefin 2014

Dydd Mercher 17 Medi 2014

• Dadl ar adroddiad y Pwyllgor Menter a Busnes ar ei ymchwiliad i gyfleoedd cyllido yr UE 2014-2020 (60 munud)

• Amser a neilltuwyd i'r Ceidwadwyr Cymreig (60 munud)

• Amser a neilltuwyd i Blaid Cymru (60 munud)

• Dadl Fer (30 munud)

Dewisodd y Pwyllgor Busnes y cynnig a ganlyn ar gyfer dadl:

Dydd Mercher 9 Gorffennaf 2014

NNDM5536

Ann Jones (Dyffryn Clwyd)

Andrew RT Davies (Canol De Cymru)

Aled Roberts (Gogledd Cymru)

Bethan Jenkins (Gorllewin De Cymru)

Cynnig bod Cynulliad Cenedlaethol Cymru:

Yn nodi'r awydd llethol ymhlith cefnogwyr pêl-droed i weld cyfleusterau sefyll diogel yn cael eu cyflwyno;

Yn galw ar Lywodraeth Cymru i weithio'n agos gyda chymdeithasau chwaraeon ac awdurdodau rheoleiddio i hyrwyddo cyfleusterau sefyll ddiogel yn stadia chwaraeon yng Nghymru; ac

Yn galw ar Lywodraeth y DU i ystyried cyflwyno cynllun peilot ar gyfer cyfleusterau sefyll diogel yng Nghymru.

Cytunodd y Pwyllgor Busnes y dylai'r ddadl nesaf gan Aelod unigol gael ei chynnal ddydd Mercher 15 Hydref 2014. 

Nododd y Pwyllgor Busnes fwriad y Llywodraeth i osod y gyllideb ddrafft ar gyfer 2015-16 ar 30 Medi 2014 ac i gyflwyno cynnig ar y gyllideb flynyddol ar 2 Rhagfyr 2014.

Cytunodd y Rheolwyr Busnes i ymgynghori â'r Pwyllgor Cyllid cyn penderfynu ar y dyddiad terfyn i'r Pwyllgor Cyllid gyflwyno adroddiad i'r Cynulliad ar y gyllideb ddrafft.

Trafododd y Pwyllgor Busnes bapur gan y Llywodraeth ynghylch Memorandwm Cydsyniad Deddfwriaethol diwygiedig mewn perthynas â'r Bil Cyfiawnder Troseddol a'r Llysoedd.

Cytunodd y Rheolwyr Busnes i beidio â chyfeirio'r Memorandwm Cydsyniad Deddfwriaethol diwygiedig at bwyllgor craffu, a nododd y bydd y Cynnig Cydsyniad Deddfwriaethol diwygiedig yn cael ei drafod yn y Cyfarfod Llawn ar 8 Gorffennaf 2014.

Trafododd y Pwyllgor Busnes bapur gan y Llywodraeth ynghylch Memorandwm Cydsyniad Deddfwriaethol atodol mewn perthynas â'r Bil Cyfiawnder Troseddol a'r Llysoedd.

Cytunodd y Rheolwyr Busnes i gyfeirio'r Memorandwm atodol at y Pwyllgor Iechyd a Gofal Cymdeithasol er mwyn iddo graffu arno. Cytunodd y Pwyllgor Busnes hefyd y dylai’r Pwyllgor gyflwyno adroddiad ar y Memorandwm Cydsyniad Deddfwriaethol atodol erbyn 25 Medi 2014 er mwyn i’r Cynnig Cydsyniad Deddfwriaethol gael ei drafod yn y Cyfarfod Llawn ar 30 Medi 2014.

Cadarnhaodd y Rheolwyr Busnes eu penderfyniad, mewn egwyddor, ar 24 Mehefin 2014 i gyfeirio'r Bil Addysg a Chynhwysiant Ariannol (Cymru) i'r Pwyllgor Plant, Pobl Ifanc ac Addysg ar gyfer ei ystyried yng Nghyfnod 1, a chytunwyd mai'r dyddiad terfyn i'r Pwyllgor adrodd ar y Bil yng Nghyfnod 1 fyddai 14 Tachwedd 2014, a'r dyddiad terfyn ar gyfer cwblhau trafodion y Pwyllgor yng Nghyfnod 2 fyddai 29 Ionawr 2015.

Ystyriodd y Pwyllgor Busnes gynigion i ddiwygio Rheol Sefydlog 26 i weithredu argymhellion y cytunwyd arnynt gan y Rheolwyr Busnes yn eu cyfarfod ar 20 Mai 2014.

Cytunodd y Rheolwyr Busnes i ymgynghori â'u grwpiau a dychwelyd at y mater mewn pythefnos.

Cytunodd y Pwyllgor Busnes â chais y Pwyllgor Amgylchedd a Chynaliadwyedd i gynnal cyfarfod ffurfiol yn Sioe Frenhinol Cymru ar 23 Gorffennaf 2014.

Yn y cyfarfod ar 17 Mehefin 2014, ystyriodd y Rheolwyr Busnes gynigion ar adolygu Cwestiynau Llafar y Cynulliad a chytunwyd i ymgynghori â'u grwpiau ar y diwygiadau posibl a amlinellir yn y papur, ac i ddychwelyd at y mater yn y cyfarfod heddiw.

Roedd Rheolwyr Busnes y Ceidwadwyr, Plaid Cymru a'r Democratiaid Rhyddfrydol yn cefnogi'r cynigion ar gyfer Cwestiynau ar Faterion Cyfoes a Chwestiynau Llefarwyr.  Roedd y Gweinidog Llywodraeth Leol a Busnes y Llywodraeth yn cefnogi'r cynnig ar gyfer Cwestiynau Llefarwyr.

Bydd y Llywydd yn ystyried yr opsiynau yng ngoleuni sylwadau'r Rheolwyr Busnes, ac yn dychwelyd i'r mater mewn cyfarfod yn y dyfodol.

Dywedodd y Gweinidog Llywodraeth Leol a Busnes y Llywodraeth wrth y Pwyllgor fod cynnig cydsyniad deddfwriaethol atodol pellach (Memorandwm Rhif 4) wedi cael ei osod heddiw ar y Bil Dadreoleiddio, ac y byddai papur yn cael ei gyflwyno i gyfarfod yr wythnos nesaf.