Cofnodion

Cafwyd ymddiheuriadau gan Lesley Griffiths a dirprwyodd Jane Hutt, y Gweinidog newydd dros Fusnes y Llywodraeth, ar ei rhan.

Nododd y Pwyllgor y cofnodion i'w cyhoeddi.

Cafodd y Pwyllgor y wybodaeth ddiweddaraf gan y Gweinidog Llywodraeth Leol a Busnes y Llywodraeth am y newidiadau i Fusnes y Llywodraeth ddydd Mawrth.

Bydd y Cyfnod Pleidleisio ddydd Mawrth ar ôl yr eitem olaf o fusnes. Cytunodd y Pwyllgor Busnes y dylid cynnal y Cyfnod Pleidleisio cyn y Ddadl Fer ddydd Mercher.

Nododd y Pwyllgor Busnes Amserlen Busnes y Llywodraeth ar gyfer y tair wythnos nesaf.

Cytunodd y Rheolwyr Busnes y bydd cwestiynau i Gomisiwn y Cynulliad yn cael eu cyflwyno wythnos ynghynt, set 1 Hydref, a bob pedair wythnos wedi hynny. Diben hyn yw creu gwell cydbwysedd o ran busnes o ystyried yr amserlen newydd ar gyfer Cwestiynau Llafar y Cynulliad, sy'n cynnwys cwestiynau i'r Gweinidog Iechyd a Gwasanaethau Cymdeithasol a'r Cwnsler Cyffredinol yn ystod yr wythnos honno.

Penderfynodd y Pwyllgor Busnes ar drefn y busnes a chytunodd i amserlennu’r eitemau a ganlyn:

Dydd Mercher 8 Hydref 2014

·         Dadl ar adroddiad y Pwyllgor Cyllid ar arfer gorau mewn prosesau cyllidebol (60 munud)

·         Dadl ar adroddiad y Pwyllgor Iechyd a Gofal Cymdeithasol ar wasanaethau orthodontig yng Nghymru.

·         Amser a neilltuwyd i Ddemocratiaid Rhyddfrydol Cymru (60 munud)

·         Dadl Fer (30 munud)

Cytunodd y Pwyllgor Busnes mewn egwyddor i gyfeirio'r Bil Cynllunio (Cymru) at y Pwyllgor Amgylchedd a Chynaliadwyedd ar gyfer ystyriaeth Cyfnod 1.

Cytunodd y Rheolwyr Busnes y byddent yn gohirio'r penderfyniad ar amserlen y Bil tan yr wythnos nesaf i roi amser i ymgynghori â'r Pwyllgor.

Trafododd y Pwyllgor Busnes bapur gan y Llywodraeth ynghylch Memorandwm Cydsyniad Deddfwriaethol mewn perthynas â'r Bil Busnesau Bach, Menter a Chyflogaeth.

Cytunodd y Rheolwyr Busnes i gyfeirio'r Memorandwm Cydsyniad Deddfwriaethol at y Pwyllgor Menter a Busnes er mwyn iddo graffu arno. Cytunodd y Pwyllgor Busnes hefyd y dylai’r Pwyllgor gyflwyno adroddiad ar y Memorandwm Cydsyniad Deddfwriaethol erbyn 16 Hydref 2014 er mwyn i’r Cynnig Cydsyniad Deddfwriaethol gael ei drafod yn y Cyfarfod Llawn ddydd Mawrth 21 Hydref 2014.

Trafododd a chymeradwyodd y Pwyllgor Busnes adroddiad drafft ar ddiwygio Rheol Sefydlog 26 mewn perthynas â Deddfau'r Cynulliad.

Cytunodd y Rheolwyr Busnes i gyflwyno cynnig i ddiwygio'r Rheolau Sefydlog, i'w ystyried gan y Cynulliad ddydd Mercher 24 Medi 2014.

Trafododd y Rheolwyr Busnes y trefniadau ar gyfer cwestiynau'r llefarwyr, a dywedodd y Llywydd wrth y Rheolwyr Busnes y bydd disgwyl i'r llefarwyr aros yn eu seddi rhwng y cwestiynau.