Cofnodion

Nododd y Pwyllgor y cofnodion i’w cyhoeddi.

 

Cafodd y Pwyllgor y wybodaeth ddiweddaraf gan y Gweinidog Cyllid a Busnes y Llywodraeth am y newidiadau i Fusnes y Llywodraeth ddydd Mawrth.

 

Nododd y Rheolwyr Busnes y byddai’r pleidleisiau ar bob eitem o fusnes ac eithrio'r ddadl Cyfnod 3 yn cael eu cynnal cyn cychwyn trafodion Cyfnod 3 ddydd Mawrth, ac y byddai pob pleidlais mewn perthynas â'r Bil Llesiant Cenedlaethau’r Dyfodol (Cymru) yn cael ei chynnal yn ystod trafodion Cyfnod 3.

 

Rhoddodd y Llywydd wybod i'r Rheolwyr Busnes ei bod yn bwriadu atal y trafodion er mwyn cael egwyl o ddeg munud cyn i drafodion Cyfnod 3 ddechrau.

 

 

Cytunodd y Pwyllgor Busnes y byddai’r Cyfnod Pleidleisio ddydd Mercher yn cael ei gynnal cyn y Ddadl Fer.

Nododd y Pwyllgor Busnes Amserlen Busnes y Llywodraeth ar gyfer y tair wythnos nesaf

Penderfynodd y Pwyllgor Busnes ar drefn y busnes a chytunodd i amserlennu’r eitemau a ganlyn:

 

Dydd Mercher 22 Ebrill 2015

·          Amser a neilltuwyd i’r Ceidwadwyr Cymreig (60 munud)

·         Amser a neilltuwyd i Blaid Cymru (60 munud)

·         Amser a neilltuwyd i Ddemocratiaid Rhyddfrydol Cymru (60 munud)

 

Dewisodd y Pwyllgor Busnes ddau gynnig ar gyfer y ddadl.

 

Dydd Mercher 18 Mawrth 2015

NNDM5712

Mick Antoniw (Pontypridd)

Jocelyn Davies (Dwyrain De Cymru)

Aled Roberts (Gogledd Cymru)

Nick Ramsay (Mynwy)

 

Cynnig bod Cynulliad Cenedlaethol Cymru yn:

 

1. Cydnabod bod technoleg ar-lein, ynghyd ag hysbysebu dwys, wedi hybu twf gamblo yng Nghymru ac yn nodi:

 

a) bod gamblo ar gael i’r boblogaeth Cymru gyfan bob awr o’r dydd;

 

b) gall pobl fynd yn gaeth i gamblo gan greu niwed cymdeithasol a chyfrannu at dlodi, problemau iechyd a phroblemau cymdeithasol;

 

c) mae’n hanfodol bod yn ymwybodol o’r broblem a chynnig cymorth yn gynnar rhag i bobl fynd yn gaeth i gamblo;

 

ch) mae’r twf mewn gamblo ar-lein a pheiriannu betio sy’n cynnig ods sefydlog wedi troi gamblo yn y DU yn ddiwydiant sy’n werth biliynau;

 

d) mae’r amgylchedd rheoleiddio ym maes gamblo’n gymharol lac.

 

2. Galw ar Lywodraeth Cymru i:

 

a) datblygu a gweithredu strategaeth i fynd i’r afael ag effaith gymdeithasol gamblo a’i effaith ar iechyd;

 

b) ymgysylltu â Llywodraeth y DU i drafod datganoli rhagor o bwerau dros drwyddedu peiriannau gamblo; ac

 

c) ymgysylltu â’r diwydiant gamblo a’r Ymddiriedolaeth Gamblo Cyfrifol i sicrhau bod cyfran o’r arian yn cael ei wario yng Nghymru i fynd i’r afael â phroblemau’n ymwneud â gamblo.

 

Dyddiad i’w drefnu

NNDM5713

Aled Roberts (Gogledd Cymru)
Paul Davies (Preseli Sir Benfro)
Rhun ap Iorwerth (Ynys Môn)

Cynnig bod Cynulliad Cenedlaethol Cymru yn:

1. Nodi cyfraniad economaidd y diwydiant dur yng Nghymru a’r miloedd o swyddi sydd ynghlwm wrtho.

 

2. Gresynu at y ffaith bod cymaint o ddur yn cael ei fewnforio ac yn boddi’r farchnad gan greu cystadleuaeth annheg.

 

3. Galw ar Lywodraeth Cymru i fabwysiadu’r Siarter ar gyfer Dur Cynaliadwy Prydain, a fydd yn sicrhau bod yr holl farrau dur carbon y mae’r Llywodraeth yn eu caffael yn bodloni safon BES 6001 yn ymwneud â chaffael o ffynonellau cyfrifol.

 

Mae’r Siarter ar gyfer Dur Cynaliadwy Prydain i’w gweld yma:

http://www2.eef.org.uk/NR/rdonlyres/04940D4A-E15E-43A5-8C41-51CD7EE4E13F/24323/TheCharterforBritishSustainableSteel1.pdf

Cytunodd y Pwyllgor Busnes y dylid cynnal dadl Aelod Unigol ar gyfer yr hanner tymor nesaf ddydd Mercher 13 Mai 2015.

 

Trafododd y Pwyllgor Busnes bapur gan y Llywodraeth ar Femorandwm Cydsyniad Deddfwriaethol Atodol (Memorandwm Rhif 4) yn ymwneud â’r Bil Busnesau Bach, Menter a Chyflogaeth.

 

Dywedodd y Gweinidog Busnes wrth y Pwyllgor fod y Bil wedi cyrraedd y camau olaf ar ei daith drwy’r Senedd. Oherwydd prinder amser, cytunodd y Rheolwyr Busnes i nodi’r Memorandwm, ac i beidio â’i gyfeirio at un o bwyllgorau’r Cynulliad at ddibenion craffu.

Cytunodd y Rheolwyr Busnes i ysgrifennu at y Pwyllgor Iechyd a Gofal Cymdeithasol ac anfon copi at y Pwyllgor Materion Cyfansoddiadol a Deddfwriaethol i ddweud wrthynt fod y Cynnig Cydsyniad Deddfwriaethol wedi’i osod ond nad oedd wedi’i gyfeirio at bwyllgor craffu.

 

Nododd y Rheolwyr Busnes y bwriedir cynnal dadl ar y Cynnig Cydsyniad Deddfwriaethol mewn perthynas â’r ddarpariaeth hon yn y Cyfarfod Llawn ar 17 Mawrth 2015.

 

Trafododd y Pwyllgor Busnes bapur gan yr Ysgrifenyddiaeth yn ymwneud â newid y Rheolau Sefydlog yn unol ag argymhellion y Pwyllgor Safonau Ymddygiad yn ei adroddiad ar Gofrestru a Datgan Buddiannau’r Aelodau a newid y rheolau’n ymwneud ag aelodaeth y Pwyllgor.

 

Cytunodd y Rheolwr Busnes, o ran egwyddor, i’r newidiadau arfaethedig i’r Rheolau Sefydlog ac i ysgrifennu at Gadeirydd y Pwyllgor Safonau Ymddygiad  i ymgynghori â’r Pwyllgor ynghylch y newidiadau arfaethedig. 

Cytunodd y Rheolwyr Busnes i drafod y mater ymhellach mewn cyfarfod arall, ar ôl i’r Pwyllgor ymateb.

 

 

Trafododd y Rheolwyr Busnes ddyddiadau dros dro’r toriadau hyd at ddiwedd y Pedwerydd Cynulliad. O gofio y bydd Pasg 2016 yn agos iawn at y dyddiad y diddymir y Cynulliad, trafododd y Pwyllgor y gwahanol bosibiliadau o ran y toriad hwnnw. 

 

Cytunodd y Rheolwyr Busnes i aros nes daw rhagor o wybodaeth i law gan y Gweinidog am raglen ddeddfu’r Llywodraeth cyn ymgynghori â’u grwpiau ynghylch dyddiad y toriad.