Agenda a chofnodion drafft

Cafwyd ymddiheuriadau gan Mair Parry-Jones (Pennaeth y Gwasanaeth Cyfieithu a Chofnodi), Chris Warner (Pennaeth Pwyllgorau Polisi a Deddfwriaeth) a Siân Wilkins (Pennaeth Gwasanaeth y Siambr a Phwyllgorau).

Nid oedd buddiannau i’w datgan.

Cytunodd Elisabeth Jones i ddrafftio nodyn ar drafodaethau’r Bwrdd Rheoli ar gyfer y dudalen newyddion.

Cyflwyniad

Yn sgil digwyddiadau diogelwch rhyngwladol diweddar, estynnodd y Bwrdd Rheoli groeso i gynrychiolwyr yr heddlu i drafod y lefel bresennol o fygythiad yn y DU a sut y gellir lliniaru unrhyw risg bosibl. Roedd hyn yn cynnwys rhoi’r wybodaeth angenrheidiol i staff er mwyn eu helpu i fod yn ddiogel pe bai digwyddiad yn codi, gan mai blaenoriaeth y Comisiwn yw diogelwch yr Aelodau a’r staff. Gwyliodd y Bwrdd fideo, ‘Stay Safe’ – canllaw yn llawn gwybodaeth a gaiff ei gynhyrchu gan y Swydddfa Gartref, am yr hyn y dylid ei wneud mewn ymosodiad â gynnau.

Er bod trefniadau diogelwch y Comisiwn eisoes yn dda, byddai’r Bwrdd Rheoli yn gweithredu ar gyngor arbenigol y tîm Diogelwch a’r Heddlu er mwyn parhau i sicrhau diogelwch yr Aelodau a’r staff. Cytunwyd y bydd y tîm Diogelwch ac aelodau o’r Bwrdd Rheoli yn llunio cynllun ar gyfer ymateb i ymosodiad â gynnau.

Dymunodd y Bwrdd yn dda i Virginia Hawkins ar ei secondiad 12 mis yn Nhŷ'r Arglwyddi wrth iddi ymgymryd â rôl Rheolwr Prosiect, yr Adolygiad Tâl a Graddfeydd.

Rhoddodd Claire Clancy wybod i'r Bwrdd am ganlyniad Pwyllgor Tŷ'r Cyffredin mewn perthynas â rôl y Prif Weithredwr a'r Clerc, pwyllgor yr oedd hi a'r Llywydd wedi cyflwyno tystiolaeth iddo.  Rhoddodd drosolwg hefyd o'i chyfarfod gyda Chlercod Cynulliad Gogledd Iwerddon a Senedd yr Alban.

Byddai'r Bwrdd Rheoli yn cwrdd nesaf ar eu diwrnod cwrdd i ffwrdd ar 8 Ionawr 2015.