Ymgynghoriad

Mae'r Pwyllgor Cyllid yn cynnal ymchwiliad i egwyddorion cyffredinol y Bil Casglu a Rheoli Trethi (Cymru). I gynorthwyo ei waith, byddai'r Pwyllgor yn croesawu eich barn am y pwnc hwn.

Cylch Gorchwyl

Dyma gylch gorchwyl yr ymchwiliad:

Ystyried—

• Egwyddorion cyffredinol Bil Casglu a Rheoli Trethi (Cymru) a’r angen am ddeddfwriaeth –
• Wrth ddod i farn ar y mater hwn, efallai y byddwch am ystyried Rhannau unigol o’r Bil:
• Rhan 2: Awdurdod Cyllid Cymru - gan gynnwys sefydlu corff cyhoeddus newydd; aelodaeth o fwrdd Awdurdod Cyllid Cymru; ei phrif swyddogaeth, dirprwyo swyddogaethau a chyfarwyddyd; pwerau statudol Awdurdod Cyllid Cymru; gwybodaeth warchodedig am drethdalwr; a threfniadaeth a threfniadau llywodraethu.
• Rhan 3: Ffurflenni treth, ymholiadau ac asesiadau- yn cynnwys dyletswyddau trethdalwyr i gadw cofnodion a’u storio’n ddiogel; ffurflenni treth; ymholiadau Awdurdod Cyllid Cymru ac atgyfeirio at dribiwnlys yn ystod ymholiad; penderfyniadau ac asesiadau Awdurdod Cyllid Cymru; hawlio am ryddhad treth mewn achos o asesu gormodol neu dreth a ordalwyd;
• Rhan 4: Pwerau Ymchwilio Awdurdod Cyllid Cymru  – gan gynnwys pwerau Awdurdod Cyllid Cymru i wneud gwybodaeth a dogfennau yn ofynnol; cyfyngiadau ar hysbysiadau gwybodaeth; archwilio mangreoedd ac eiddo arall.
• Rhan 5: Cosbau  - gan gynnwys cosbau am fethu â chyflwyno ffurflenni treth, anghywirdebau yn ymwneud â threfniadau cadw cofnodion a threfniadau talu’n ôl, ac yn ymwneud ag ymchwiliadau; talu cosbau; ac atodol;
• Rhan 6: Llog – yn cynnwys llog ar symiau sy’n daladwy i Awdurdod Cyllid Cymru a ganddi; a chyfraddau llog;
• Rhan 7: Talu a gorfodi  - gan gynnwys talu ac ardystio dyled; ac adfer;
• Rhan 8: Adolygiadau ac apelau - gan gynnwys penderfyniadau apeladwy; adolygiadau; apelau; canlyniadau adolygiadau ac apelau; a chytundebau setlo;
• Rhan 9: Ymchwilio i droseddau  - gan gynnwys pwerau i ymchwilio i droseddau; enillion troseddau; a rheoleiddio pwerau ymchwilio;
• Rhan 10: Darpariaethau terfynol - yn cynnwys pŵer i wneud darpariaeth ganlyniadol; rheoliadau; dyroddi hysbysiadau; a rhoi hysbysiadau a dogfennau eraill i Awdurdod Cyllid Cymru.
• unrhyw rwystrau posibl o ran rhoi’r darpariaethau hyn ar waith ac a yw’r Bil yn eu hystyried;
• a oes unrhyw ganlyniadau anfwriadol yn deillio o’r Bil
• goblygiadau ariannol y Bil ( fel y nodir yn Rhan 2 o’r Memorandwm Esboniadol); 
• priodoldeb y pwerau yn y Bil i Weinidogion Cymru wneud is-ddeddfwriaeth  (fel y nodir ym Mhennod 5 o Ran 1 o’r Memorandwm Esboniadol).

Gwahoddiad i gyfrannu i'r ymchwiliad

Mae'r Pwyllgor yn croesawu tystiolaeth gan y rhai sydd â buddiant yn y pwnc hwn.

Os ydych yn ymateb ar ran sefydliad, dylech roi disgrifiad byr o rôl eich sefydliad. Mae’r Pwyllgor yn croesawu cyfraniadau yn Gymraeg ac yn Saesneg, a gofynnwn i sefydliadau sydd â pholisïau/cynlluniau iaith Gymraeg ddarparu ymatebion dwyieithog, yn unol â’u polisïau gwybodaeth gyhoeddus. Bydd y Pwyllgor yn ystyried yr ymatebion i’r ymchwiliad ac yn cynnal sesiynau tystiolaeth lafar yn ystod tymor y gwanwyn.

Dylai unrhyw dystiolaeth gyrraedd erbyn 8 Medi 2015. Mae’n bosibl na fydd modd ystyried ymatebion a ddaw i law ar ôl y dyddiad hwn.

Ni ddylai’r dystiolaeth fod yn hwy na phum ochr tudalen A4. Dylid rhifo’r paragraffau, a dylai’r dystiolaeth ganolbwyntio ar y materion uchod. Gweler y  canllawiau ar gyfer y rhai sy'n darparu tystiolaeth i bwyllgorau.

Datgelu gwybodaeth

Mae gan y Cynulliad bolisi ynghylch datgelu gwybodaeth. Gofalwch eich bod yn ystyried y manylion hyn yn ofalus cyn cyflwyno gwybodaeth i'r Pwyllgor.  Neu, mae copi caled o'r polisi hwn i'w gael drwy gysylltu â'r Clerc (Leanne Hatcher 0300 200 6343).