P-05-895 Etifeddiaeth Rosa: Dylid cyflwyno cynllun i helpu pobl i gael hawl i ofal milfeddygol ar gyfer eu hanifeiliaid anwes
P-05-895 Etifeddiaeth Rosa: Dylid cyflwyno cynllun i helpu pobl i gael hawl i ofal milfeddygol ar gyfer eu hanifeiliaid anwes
Cyflwynwyd y ddeiseb hon gan Linda Joyce Jones, ar ôl
casglu cyfanswm o 95 lofnodion.
Geiriad y ddeiseb:
Rydym yn galw ar Gynulliad Cenedlaethol Cymru i
ofyn i Lywodraeth Cymru gyflwyno cynllun i helpu perchnogion cyfrifol
anifeiliaid anwes i gael hawl i ymgynghoriadau milfeddygol wyneb yn wyneb a
gofal ar gyfer eu hanifeiliaid.
O eleni ymlaen bydd gan Lywodraeth Cymru bwerau
trethu cyfyngedig eu hunain am y tro cyntaf. Ers blynyddoedd lawer mae pobl
gyffredin wedi cael trafferthion i dalu costau byw sylfaenol, ac mae hyn yn
parhau. Nid oes dim amheuaeth ynglŷn â'r manteision i iechyd meddwl a
llesiant pobl o gael anifail anwes. Mae llawer o'r anifeiliaid yn dod yn rhan
o'r teulu. I bobl sy'n byw ar eu pennau'u hunain neu'n anghysbell, gall yr
anifail fod yr unig gwmni sydd ganddynt.
Mae gwyddoniaeth filfeddygol, fel y rhan fwyaf o
broffesiynau, wedi esblygu'n gyflym dros y blynyddoedd diwethaf. Mae
Llawfeddygon Milfeddygol, nyrsys milfeddygol a'u staff cymorth sy'n gweithio ar
y "rheng flaen" yng Nghymru yn gwneud hynny o dan amgylchiadau heriol
iawn yn aml. Mae'n dda gweld bod eu corff llywodraethol, sef Coleg Brenhinol y
Milfeddygon (RCVS) wedi cydnabod hyn yn y blynyddoedd diwethaf ac wedi cymryd
camau i geisio cefnogi llesiant iechyd meddwl o fewn y proffesiwn. Ond yn
wahanol i iechyd dynol yng Nghymru, nid oes gwasanaeth am ddim ar gael gan y
Gwasanaeth Iechyd Gwladol ar gyfer anifeiliaid pan fyddant ei angen, bedair awr
ar hugain y dydd, saith diwrnod yr wythnos.
O dan adran 3.16 o Ddeddf Lles Anifeiliaid
(Cymru a Lloegr) 2006, cyfrifoldeb y perchnogion yw darparu ar gyfer pum angen
llesiant sylfaenol anifeiliaid, a'r pumed o'r rhain yw ei "amddiffyn rhag
dioddef poen, anaf a chlefyd".
Gwybodaeth
ychwanegol:
Mae'r maes yswiriant
ar gyfer anifeiliaid anwes wedi ffynnu yn y blynyddoedd diwethaf. Ond gall llawer o berchnogion cyfrifol barhau
i gael trafferth i gael gwarchodaeth yswiriant ar gyfer eu hanifeiliaid anwes.
Mae hyn yn sgîl cyflyrau sydd eisoes yn bodoli, cŵn sydd wedi'u heithrio
oherwydd deddfwriaeth benodol ar fridio, neu lawer o anifeiliaid anwes sydd, yn
syml, angen rhagor o driniaeth na'r hyn y mae polisi yswiriant eu perchnogion
yn ei ganiatáu.
Mae rhai sefydliadau'r
trydydd sector, fel yr elusen filfeddygol PDSA, wedi ceisio llenwi'r bwlch ers
sawl blwyddyn. Maent wedi gwneud gwaith clodwiw, ond yn y blynyddoedd diwethaf
maen nhw, hyd yn oed, wedi gorfod gwneud y penderfyniad torcalonnus i gwtogi ar
eu darpariaeth. Nid oes gan rai ardaloedd yng Nghymru ddim ysbytai anifeiliaid
na chlinigau milfeddygol o fath yn y byd a ddarperir gan elusennau.
Mae tuedd bryderus
hefyd i berchnogion droi at fforymau ar y cyfryngau cymdeithasol i gael cyngor
ar faterion clinigol, yn hytrach na mynd â'u hanifeiliaid i bractis
milfeddygol. Rwy'n adnabod pobl sy'n ateb llinellau ffôn cymorth ar ran
elusennau anifeiliaid. Dywedant wrthyf fod y duedd hon yn cael ei ailadrodd.
Gyda'm cefndir i ym
maes achub anifeiliaid, rwyf wedi bod yn argyhoeddedig ers blynyddoedd lawer
fod nifer cynyddol o anifeiliaid anwes yn cael eu gadael neu eu rhoi mewn
canolfannau achub, yn rhannol, oherwydd nad yw pobl yn gallu ariannu gofal
milfeddygol ar eu cyfer. Mae'r canolfannau achub yng Nghymru yn orlawn, ac
mae'r holl ystadegau sydd ar gael yn dangos bod achosion o'r fath, ac unrhyw
erlyniadau sy'n deillio ohonynt, yn codi.
Yn gyntaf, byddai
cynllun o'r fath yn helpu anifeiliaid anwes a'u perchnogion. Byddai hefyd yn
helpu'r rheini sy'n gweithio ar y rheng flaen yn y canolfannau achub
anifeiliaid, ac yn sicr yn helpu'r proffesiwn milfeddygol yng Nghymru, sydd
hefyd ar adegau yn gweithio mewn amgylchiadau heriol tu hwnt.
Statws
Yn ei gyfarfod ar 15/11/2021 penderfynodd y Pwyllgor
Deisebau fod y ddeiseb hon wedi'i chwblhau.
Nododd y Pwyllgor y bydd Llywodraeth Cymru yn
cyhoeddi ei Chynllun Lles Anifeiliaid i Gymru 2021-26 yn fuan. Yn ogystal,
cytunodd y Pwyllgor i ysgrifennu at y Gweinidog unwaith eto, ac am y tro olaf,
i wneud cais bod sylw yn cael ei roi i’r galwadau am gynllun i helpu pobl i
gael hawl i ofal milfeddygol ar gyfer eu hanifeiliaid anwes. Wrth wneud hynny,
cytunodd y Pwyllgor y byddai’n cau’r ddeiseb ac yn diolch i’r deisebydd am
godi’r mater hwn.
Gellir gweld manylion llawn ynghylch trafodaeth y
Pwyllgor o'r ddeiseb hon a'r dogfennau cysylltiedig ar y tab Cyfarfodydd uchod.
Cafodd ei thrafod gyntaf gan y Pwyllgor Deisebau
ar 15/10/2019.
Etholaeth a Rhanbarth y
Senedd
- Arfon
- Gogledd Cymru
Rhagor o wybodaeth
- Hafan y Pwyllgor Deisebau
- Gweld pob deiseb sydd ar agor
- Gweld pob deiseb mae’r pwyllgor bellach yn ystyried
- Sut mae proses Ddeisebu yn gweithio
Math o fusnes: Deiseb
Rheswm dros ei ystyried: Busnes y Senedd;
Statws: I'w ystyried
Cyhoeddwyd gyntaf: 20/08/2019